A tornin a vierzi i museus archeologjic e dal Risorgimento

Vinars prin di Març, a cinc dopodimisdì, a al torne a vierzi al public il museu archeologjic e chel dedicât al “Risorgimento” che a cjatin acet in te ale Est e ta chê Ovest dal plan tiere dal cjistiel di Udin. O soi une vore content par cheste dople scree che al à tornât a meti a disposizion de citât un patrimoni che di agns no si podeve plui viodi, al à comentât il sindic Furio Honsell, che al à fevelât di une risorse une vore impuartante pe citât e pe identitât furlane. Ancje l’assessôr pe culture Luigi Reitani al à pandût la sô sodisfazion par cheste scree che e va a sierâ un procès pardabon impuartant di slargjament de rêt museâl de citât. La sezion dedicade al “Risorgimento” e jere stade screade pe prime volte ancjemò intal 1906. La sezion archeologjiche e diven massime di donazions leadis al colezionisim che al à compagnât la ricercje archeologjiche furlane a cjaval tra la fin dal Votcent e i prins dal Nûfcent; inte prime sale si à une racuelte di reperts de Magne Grecie, la seconde e cjape dentri un patrimoni di ogjets che a van de Protostorie ae Ete di Mieç, intant che la tierce e je dedicade a Luigi Pio Tessitori e ae ricercje archeologjiche intal forest. A sierâ il percors museâl gnûf si à il lapidari cun epigrafis, monuments e sculturis di ete romane. Lis salis a puedin jessi viodudis cul biliet par visitâ il cjistiel e cui stes oraris (di 10.30 a 17 vie pal Unvier e fin a 19 cuant che si à l’orari estîf).