Impresis inovativis, si viodin za i prins risultâts

A nancje cuatri mês de presentazion a cjapin forme lis ideis svilupadis des dôs impresis che a àn vinçût il bant par impresis inovativis imbastît dal Comun e de Cjamare di Cumierç di Udin. Si trate de stue a cumul microgassificative pensade par limitâ lis emissions incuinantis mandadis fûr inte atmosfere dai implants di riscjaldament cjasalins, e de aplicazion par smartphone e tablet par promovi daurman e in maniere creative la proprie ativitât comerciâl sul web. Il prin dai doi progjets al è stât svilupât de Blucomb, societât udinese fondade intal 2012 tant che spin-off de universitât furlane. Il secont invezit al è stât metût adun de societât Ahun, start-up Microsoft Bizspark logade intal Parc Sientific e Tecnologjic di Udin. Chestis dôs realtâts a jerin stadis selezionadis dal Comun di Udin framieç di diviersis candidadis e a vevin vinçût un contribût di 20 mil euros ognidune. E je la prime volte che a Udin si invie une iniziative di cheste fate e o sin une vore contents di cemût che e va indenant, al à dite l’assessôr comunâl pe inovazion, Gabriele Giacomini, intal comentâ i svilups dal progjet.