Cul 2016 a tacaran i lavôrs dal Pisus

Cul prin di Zenâr dal 2016 si tacaran a viodi i prins risultâts dai 3 milions di euros di fonts Pisus che la Regjon Friûl – Vignesie Julie i à concedût al Comun di Udin par ricualificâ il centri storic de citât. Fonts che il Comun al incressarà cuntun stanziament di un milion e 800 mil euros. Cuntun protocol di intese sotscrit ai 18 di Fevrâr tra Comun e Regjon, di fat, a son stâts fissâts i timps e lis areis di intervent dulà che i bêçs a varan di jessi metûts. A son trê in struc i cjamps là che i fonts a saran impleâts. Il prin al è chel des oparis publichis che a van, par fâ cualchi esempli, dai intervents di pedonalizazion ae costruzion di pistis ciclabilis, dai marcjepîts gnûfs aes azions di sigurece stradâl, dal infuartî lis stazions di bike-sharing al fâ sù chês di condivision des machinis ecologjichis. Une seconde aree di intervent e je invezit chê de creazion dal centri comerciâl naturâl. Tierç setôr al è chel des incentivazions economichis aes ativitâts comerciâls, artesanâls e dai servizis, che al sarà concuardât cu la Cjamare di Cumierç, cu lis associazions di categorie e cu la associazion UdineIdea. Pal assessôr pes ativitâts economichis e turistichis Alessandro Venanzi “Di chi al inizi di chest an che al ven, cuant che si inviaran i lavôrs, si pues tacâ a pensâ intal concret a dutis lis iniziativis e a dutis lis oportunitâts che i finanziaments regjonâi pal centri storic a puedin meti in vore”.