Ai 27 di Fevrâr si invie la gnove stagjon di Calendidonna

E torne ancje chest an Calendidonna, la rassegne inmaneade dal Comun di Udin adun cu la Comission pe paritât cun chê di slargjâ la voglade sul univiers des feminis. Une vincjine i apontaments in calendari che si movin tra cine e teatri, presentazions di libris e confronts su temis di atualitât, musiche e poesie. La iniziative e nas ancje in gracie dal contribût di cetantis realtâts dal teritori tant che il Teatro Club, Teatro Sosta Urbana, CEC, academie Nico Pepe, associazion Core, Cjase des feminis, associazion SeNonOraQuando, ANPI, LiberEtà e altris ancjemò. A screâ il calendari des iniziativis al sarà Akròpolis, la stagjon di teatri civîl proponude dal Teatro Club, che vinars ai 27 di Fevrâr a nûf di sere (21.00) alì dal teatri Palamostre e propon il spetacul “Vita agli arresti di Aung San Suu Kyi” di Marco Martinelli. La dì dopo invezit, a sîs sot sere (18.00) intal salon dal Parlament sù in cjistiel, si varà “Il matar, la figlia dell’aria”, un apontament di musiche e poesie. Lis iniziativis a laran po indenant fin ai 30 di Març, cuntune ponte domenie ai 8 di Març. La Zornade des Feminis si invie a dîs e mieze di matine (10.30) cuntun percors storic al feminin che dal Templi Ossari al rive al Museu etnografic. A nûf di sere (21.00) alì dal teatri Giovanni da Udine e rive la cjantautore americane Joan Baez. Tal stes lûc, ma a cuatri dopodimisdì (16.00) si scree la mostre dal vinîl leade a Joan Baez curade di Angelo Tomasin, intant che a sîs (18.00) sl è in program un incuintri cu lis cjantautoris Giulia Daici e Serena Finatti.