Cors di inzornament su “Feminis, politiche e istituzions”

Ai 27 di Fevrâr, a sîs sot sere (18.00), la Cjase des feminis i da acet ae presentazion dal cors di inzornament “Feminis, politiche e istituzions. Podê e podês” inmaneât de Universitât di Udin cu la poie de Regjon. La iniziative, rivade zaromai ae sô diesime edizion, e à chê di incressi lis competencis dirigjenziâls e di gjestion di cui che al partecipe. I temis frontâts a son: cuistions e politichis di gjenar, paritât tra om e femine, aministrazion e istituzions, comunicazion e media. Cun di plui a son previodudis ancje visitis di istruzion cu la partecipazion a riunions di diviers Conseis comunâi. La iniziative e je vierte a ducj i interessâts che a vedin almancul il diplome di scuele secondarie superiôr. Bant e informazions par iscrivisi si ju cjate alì de direzion www.uniud.it/didattica/post_laurea/altra_formazione/elenco-corsi. La iscrizion e va presentade dentri di lunis ai 9 di Març, il cors al tacarà invezit ai 13 di Març e al previôt 60 oris tra lezions frontâls e ‘seminaris interatîfs. Lis lezions si tignaran a Udin il vinars dopodimisdì e, une volte al mês, la sabide di matine.