Il “Banco lib(e)ro” al ponte a slargjâ il so servizi

350 mil volums metûts in circolazion in dîs agns, 41.611 vie pal 2014. A son lis cifris dal “Banco lib(e)ro” o sei un servizi di utilitât publiche che si fonde sul principi dal scambi libar e dal recupar des risorsis par tirâ dongje libris, enciclopediis e dizionaris, ma ancje rivistis e materiâi multimediâi, metûts po a disposizion de coletivitât sore nuie. Dopo vê finît i siei prins agns intal Dicembar stât, il Banc al ponte a incressi inmò di plui lis ocasions di incuintri tra libris e letôrs. Cussì dopo vê consegnât libris a personis, associazions, scuelis, bibliotechis e presons, si volarès rivâ ancje alì des salis di spiete dai ambulatoris, intai locâi e intes buteghis e si invide duncje lis associazions di categorie a doprâ chest patrimoni de coletivitât. Baste lâ alì de sede, logade inte Cjase de Imacolade, che e je vierte i dopodimisdîs di lunis, miercus e vinars di cinc fin siet (17.00 – 19.00) e il miercus ancje di matine, di dîs fintremai misdì (10.00 – 12.00). Dut a gratis e cence oblic di tornâ indaûr ce che si à cjapât sù. Il magazen al è gjestît dai fantats imigrâts che e àn cjatât acet alì dal istitût di vie Chisimaio, dai dispatriâts cjapâts dentri intal progjet Efraim e di un grup di volontaris cu la poie tecniche de biblioteche civiche Joppi e di chê di cuartîr.