Vinars scree “didatiche” pe cjase de aghe di vie Joppi

Scree didatiche doman, vinars ai 5 di Març a undis di matine (11.00), pe cjase de aghe di vie Joppi, alì dal parc machinis de biblioteche de Circoscrizion. Cun di fat, pe ocasion, a partecipâa saran ancje i arlêfs de scuele primarie Lea D’Orlandi che, in plui dal funzionament dal sisteme par purificâ la aghe, si ur spiegarà ancje i stîi di vite corets e i efiets positîfs pal ambient leâts al ûs de cjase de aghe. A fâur di compagnadôrs, in plui dal personâl de imprese che e à fat sù l’implant (Chiara Natural), a saran Marino Visintini dal circul Legambiente di Udin, il sindic Furio Honsell, l’assessôr pes ativitâts produtivis Alessandro Venanzi e la conseire delegade di cuartîr Eleonora Meloni. In plui de cjase de aghe di vie Joppi, a Udin a son in vore i implants dal parc Moretti, di vie Chisimaio e di viâl Forze Armate. Intai prossims mês si à po in program di vierzi altris cjasis de aghe ancje su plaçâl Diacono, tra lis viis S. Daniele e Ampezzo, in vie Bariglarie e in vie Piutti.