I “Nuovi Luoghi Comuni” di Cattaruzzi ae Modotti

Une selezion di uns cuarante imagjins, pe plui part riferidis ae nestre regjon, che a proponin a cui che lis cjale la cussience dal cambiament di une tiere, vivût dispès cun distrazion o fintremai cun indiference. Chest il teme al centri de mostre “Nuovi Luoghi Comuni – Dal territorio al non-luogo” dal fotograf Giacomo Cattaruzzi che si scree sabide ai 7 di Març, a sîs sot sere (18.00), alì de galarie “Tina Modotti”. A presentâle, dongje dal autôr, a saran l’assessôr pe culture Federico Pirone, la presidente de delegazion udinese dal FAI Laura Stringari, e il professôr Antonio Giusa. La esposizion, metude adun cul jutori dal Comun, dai Museus Civics e dal FAI, e sarà vierte al public fintremai i 6 di Avrîl, il vinars, la sabide e la domenie di cuatri e mieze dopodimisdì a siet e mieze sot sere (16.30 – 19.30). La jentrade e je libare.