A Cjase Cavazzini i concierts di “Arti Parallele”

Dopo de manifestazion ‘Arti parallele’ vie pal an passât a Cjase Cavazzini, la colaborazion tra la associazion Amici della Musica e il Museu di art moderne e contemporanie di Udin si insiore di altris apontaments che a son stâts batiâts Cavazzini Concerti. La iniziative e previôt une schirie di concierts che si tignaran inte sale dal plan tiere dal museu e che a àn chê di cjatâ fûr i contignûts artistics comuns che a divegnin de musiche e des arts figurativis. A introdusi i apontaments a saran la conservadore dal museu Vania Gransinigh, pe part figurative, e la presidente dai Amici della Musica Luisa Sello pe part musicâl. La iniziative si invie domenie ai 15 di Març a undis di matine (11.00), cun jentrade a 5€. Il prin apontament si ispire ae piture di Claudio Olivieri titulade Magnum 3 e al varà tant che protagoniscj il Trio Porteno cun musichis di Bach, Piazzolla, Brahms. I apontaments seguitîfs a son in program ai 10 di Avrîl e ai 21 di Mai.