Cui 22 di Març si invie “EScursioni/INcursioni in città”

La sezion udinese de Uoei, cul patrocini e cu la colaborazion dal Comun, e à inmaneât cinc escursions ator pe citât par scuvierzi i siei lûcs storics, culturâi e ambientâi. Si trate di “EScursioni/INcursioni in città” che al propon la sô prime escursion domenie ai 22 di Març, dilunc di un percors di uns cinc chilometris che si sviluparà di puarte Aquilee al cjistiel par tornâ a sierâsi alì dal poç di Bordolee. Il program al va indenant ai 19 di Avrîl e ai 24 di Mai cun dôs visitis dedicadis a diviers aspiets dal cuartîr di Sant Svualt. Ai 21 di Jugn si fasarà une cjaminade tra i Riçs e il parc dal Cormôr, e ai 20 di Setembar alì dal ort botanic de Provincie di Udin. Dutis lis escursions si davuelzaran tra nûf di buinore e misdì (9.00 – 12.00). Tant che sierade de iniziative, ai 11 di Otubar, si varà la tierce edizion de Zornade taliane dal cjaminâ. Il program in detai si pues cjatâlu sui sîts www.udinecultura.it e http://udine.uoei.it. La partecipazion e je libare e sore nuie, ma par resons organizativis al covente comunicâ prime se si vûl aderî.