Vie libare de Zonte al regolament pal vert public

La Zonte comunâl e à fat bon il gnûf regolament pal ûs e pe gjestion des areis verdis publichis che al rivarà in curt in Comission teritori e ambient e po in Consei comunâl pe aprovazion definitive. Udin al è ai prins puescj a nivel talian par superficie medie di vert acessibile. Cun di fat, si fevele di passe 150 areis verdis furnidis e une vincjine no furnidis, 2 parcs naturâi, 14 zardins storics, plui di 50 areis verdis di partignince scolastiche e 10 centris sportîfs par un totâl di passe 1 milion e 700 mil metris cuadris, che si i zonte il milion di metris cuadris dai spazis verts ad ôr de viabilitât urbane. Tra lis novitâts plui impuartantis, cemût che al à ricuardât l’assessôr pal ambient Enrico Pizza, e je la viertidure ae colaborazion cui privâts. Trê lis formis previodudis: la sponsorizazion finanziarie che i da visibilitât al finanziadôr in cambi di un contribût economic, la sponsorizazion tecniche che i da visibilitât al finanziadôr in cambi di un intervent par miorâ la aree verde, e la adozion di une aree cu la manutenzion e la ricualificazion curade di volontaris. Cun di plui, i privâts a varan la pussibilitât di doprâ i zardins storics daûr di tarifis decidudis dal Consei comunâl. Pal rest il regolament al fisse lis normis di tutele e di rispiet dal vert public cun multis che a van di 25 a 150 euros.