Presentât il belanç di fin mandât

Il sindic Furio Honsell, compagnât di ducj i assessôrs de sô Zonte, al à presentât vuê il belanç consuntîf di fin mandât, un document là che a son dentri lis iniziativis, i progjets e i servizis svilupâts dilunc de dade 2008 – 2013 adun cui obietîfs che a son stâts otignûts. “In cinc agns o vin rivât a invistî cuasi 80 milions di euros in oparis publichis aumentant l’indebitament dal Comun dome di 4 milions intun moment storic une vore dificil e cence finanziaments” al à dite Honsell tal presentâ il document. L’impegn principâl sul front des oparis publichis al è stât chel pes scuelis cuntun invistiment di passe 26 milions di euros là che a son cjapâts dentri la gnove scuele de infanzie di vie Pradaman e la ristruturazion dai istitûts Manzoni e Nievo. La aministrazion e je po intervignude su plui di 80 chilometris di stradis, cuasi un cuart dal totâl, e su 23 chilometris tra marcjepîts, fognis e lûs publichis. Atris intervents a son stâts indreçâts a meti in sest diviers implants sportîfs e part dal patrimoni architetonic dal centri a tacâ di palaç Giacomelli, di cjase Cavazzini e dal complès dai zardins di vie Del Torso. Tra i obietîfs centrâts, al à zontât il sindic, si à po la aprovazion dal Plan regoladôr gnûf dopo 40 agns e chê dal regolament edilizi gnûf cu la introduzion di normis di eficience energjetiche. Par Honsell chescj agns di guvier a àn viodût une atenzion fuarte ancje pai servizis sociâi e pe inovazion, cundut di une disponibilitât di risorsis simpri plui basse de bande de Regjon e dal Guvier talian.