E je tacade la setemane cuintri dal razisim

Il Comun al aderìs ae diesime prime setemane di azion cuintri dal razisim, promovude de Unar e dal Anci, in program dai 16 ai 22 di Març. Poiâ cheste iniziative, al à dit il sindic Furio Honsell, al vûl dî sclarî ancjemò une volte cuale che e je la volontât de aministrazion comunâl, ven a stâi ricognossi i dirits di dutis lis personis cence lâ daûr di gjenar, religjon, etnie, orientament sessuâl o etât. Ogni citadin, al à dit simpri Honsell, al à il dovê civîl, in plui che morâl, di lâ cuintri dal razisim, de ipocrisie e de intolerance, mûts di jessi che magari cussì no a son presints te nestre societât. La decision di aderî ae campagne butade fûr de Unar e de Anci: “Accendi la mente, spegni i pregiudizi” e je stade fate buine de Zonte comunâl su propueste de assessore pai dirits e pe inclusion sociâl Antonella Nonino.