Joibe e torne a dâsi dongje la “Taule a pedâi”

Un imprest di partecipazion par aministrazion e citadins che al à chê di sburtâ l’ûs de bici par miorâ i stîi di vite, ma ancje la cualitât ambientâl e l’atrat turistic. Al è l’intindiment de “Taule a pedâi” metude sù l’an passât par iniziative dai assessôrs pal sport, pe educazion e pai stîi di vite Raffaella Basana, pe mobilitât e pal ambient Enrico Pizza, e pal cumierç e pal turisim Alessandro Venanzi. Dopo dai prins mês dedicâts ai incuintris cui citadins par tirâ dongje informazions e propuestis su lis ativitâts za in vore e su chês di podê imbastî in curt, cumò la Taule e torne a clamâ adun ducj i siei membris intune riunion vierte ancje ae citadinance. L’apontament si tignarà joibe ai 19 di Març a sés sot sere (18.00) in sale Ajace. Intant dal incuintri si presentarà ancje il progjet pe gnove piste ciclopedonâl che si fasarà in vie Grazzano.