Violencis su feminis e minôrs, cors pe polizie locâl

Fâ sù un puint tra i agjents de polizie locâl e lis realtâts che a operin par fâi cuintri ae violence su lis feminis e sui minôrs. Al è chest il sens dal cors inmaneât dal Comun di Udin par lunis ai 23 di Març e par miercus prin di Avrîl alì dal comant di vie Girardini. Al è un cors indreçât al personâl de polizie locâl par judâlu a gjestî miôr i intervents che al podarès cjatâsi a davuelzi in câs di violence su lis feminis o sui minôrs, e par fâlu jentrâ intune rêt là che a son za dentri, tra i altris, Prefeture, Cuesture, Comun e Provincie di Udin, Aziende Sanitarie e il progjet “Zero tolerance”.