Cui 24 di Març zûcs e novitâts alì dal Parc dal Cormôr

Une torate alte plui di 4 metris, niçui, sbris, une gjostre e tancj altris zûcs, ma ancje manutenzion e sistemazion des struturis e dal vert. Si trate di ce che il Comun al à fat par rindi simpri plui furnît e di atrat il parc dal Cormôr. Il dut cuntune spese di plui o mancul 130 mil euros. La scree uficiâl de gnove aree cui zûcs e dai intervents fats e je in program martars ai 24 di Març a trê e mieze dopodimisdì (15.30) cu la partecipazion dal sindic Furio Honsell, e dai assessôrs pal ambient Enrico Pizza e pal sport e stîi di vite Raffaella Basana.