Sì de Zonte aes liniis par rindi disponibii i dâts publics

Te riunion dai 24 di Març, la Zonte comunâl e à fatis buinis, su propueste dal assessôr pe inovazion Gabriele Giacomini, lis liniis di indreçament par publicâ i dâts publics in formât viert daûr des diretivis de Agjende pe Italie Digjitâl e des Liniis di indreçament talianis su la valorizazion dal patrimoni informatîf public. Il test al fisse i criteris, lis modalitâts e i timps par sielzi i dâts e i documents di publicâ, ma ancje la organizazion interne, lis proceduris e i timps par procedi cu la racuelte, cu la catalogazion e cu la publicazion dai dâts. Ta cheste suaze a saran decidûts un responsabil e un grup di lavôr che a varan il compit di promovi e di publicâ i dâts. Intes liniis di indreçament si regolin ancje i spazis pes domandis di modifiche o di integrazion dai dâts che a rivin dai citadins. La iniziative, al spieghe l’assessôr Giacomini, in plui di favorî la democrazie partecipative, i permet a impresis e singui di doprâ i dâts par svilupâ servizis e gnovis aplicazions di interès coletîf.