Si resone su cemût puartâ i trens fûr de citât

“O ai dât mandât al comandant de polizie locâl di valutâ la pussibilitât di dâ fûr une ordenance par difidâ Trenitalia dal continuâ a fâ passâ pe citât i trens pes marcjanziis.” A dîlu al è stât il sindic di Udin Furio Honsell intant di un incuintri che, intune cui assessôrs Lorenzo Croattini, Enrico Pizza e Mariagrazia Santoro, al à vût cun Sara Perdon, componente dal comitât che in nancje une setemane al à tirât sù passe un miâr di firmis par domandâ la eliminazion dai passaçs a nivel di vie Cividât, vie Buri, vie dal Bon e viâl Vât, e la deviazion dai trens pes marcjanziis sul passant feroviari fûr de citât. La aministrazion comunâl e je duncje impegnade par sburtâ Trenitalia a spostâ il trafic des marcjanziis su la trate intierade di S. Gotart e risolvi cussì un probleme che si strissine di agns. Cun chest fin, il sindic e i rapresentants dal comitât citadins a domandaran al prefet di clamâ dongje une taule di lavôr là che a partecipin ancje i rapresentants de Regjon e di Trenitalia.