Ultins dîs pai “Nuovi Luoghi Comuni” di Cattaruzzi

Al è timp ancjemò fin ai 6 di Avrîl par viodi alì de galarie “Tina Modotti” la mostre “Nuovi Luoghi Comuni – Dal territorio al non-luogo” dal fotograf Giacomo Cattaruzzi. A vuê a son passe un miâr lis personis che a àn visitât la esposizion là che si cjate une selezion di cuarante imagjins che a proponin i mudaments dal paisaç, vivûts masse dispès cun distrazion o fintremai cun indiference. La mostre, metude adun cul jutori dal Comun, dai Museus Civics e dal FAI, e je vierte al public il vinars, la sabide e la domenie di cuatri e mieze dopodimisdì a siet e mieze sot sere (16.30 – 19.30). Stes oraris di viertidure ancje par Pasche e pal Lunis di Pasche. La jentrade e je libare.