Domenie e lunis di Pasche museus civics vierts al public

Domenie e lunis di Pasche i museus civics dal Comun di Udin a restin vierts al public. Plui in detai, il Cjistiel al è viert domenie di dîs e mieze di matine fin cinc dopodimisdì (10.30 – 17.00) e la dì dopo fin sîs e mieze sot sere (18.30) par dâi acet ae seconde edizion di “Musica e Musei”. Il Museu Etnografic e Cjase Cavazzini a restin vierts sei domenie che lunis di dîs e mieze di matine fin cinc dopodimisdì (10.30 – 17.00). Tal prin câs si pues ancjemò viodi la mostre dedicade a Alberto Calligaris che e siere po ai 12 di Avrîl, intal secont câs, dongje des colezions stabilis, e je la esposizion “Un’idea di Pittura. Astrazione analitica in Italia 1972-1976”. La galarie fotografiche “Modotti” e je vierte dutis lis dôs zornadis di cuatri e mieze dopodimisdì a siet e mieze sot sere (16.30 – 19.30). Si ricuarde po che il servizi di bus che di place Libertà al mene sù sul splaç dal Cjistiel al è in vore ancje il lunis di dîs e mieze di matine a misdì e mieç (10.30 – 12.30) e di dôs e mieze dopodimisdì a sîs e mieze sot sere (14.30 – 18.30).