Udin protagonist ai 17 di Avrîl dal “Meeting di pace”

Passe trê mil zovins a rivaran in Friûl ai 17 e ai 18 di Avrîl par un grant apontament di pâs che, intai cent agns de jentrade in vuere de Italie al vûl trasformâ lis trinceris in laboratoris di pâs. La iniziative e je stade presentade in maniere uficiâl vuê di buinore, a palaç D’Aronco, cu la partecipazion dal sindic Furio Honsell, dal assessôr comunâl pe culture Federico Pirone, dai assessôrs regjonâi pe istruzion Loredana Panariti e pe culture Gianni Torrenti, e dal diretôr dal coordenament talian dai ents locâi pe pâs e pai dirits umans Flavio Lotti. L’incuintri di pâs (Meeting di pace) al varà tant che lûc di riferiment la citât di Udin, ma e tocjarà ancje i lûcs là che a son lis trinceris de prime vuere mondiâl tant che Drencje, Foian, Gurize, Monfalcon, Sagrât, Savogne dal Lusinç e, in Slovenie, Nova Gorica e Tulmin. Protagoniscj dal apontament a saran students e insegnants des scuelis mediis e superiôrs di dut il stât talian impegnâts in programs di educazion ae citadinance e in percors di pâs, ma ancje rapresentants di associazions e istituzions che a poin chescj percors. Plui in detai, la rivade dai partecipants a Udin e je fissade par joibe ai 16 di Avrîl, intant che la manifestazion e tacarà la dì dopo. La matine di vinars ai 17 di Avrîl a son previodûts dîs laboratoris su la pâs e su la vuere che si davuelzaran in diviers lûcs de citât, intal dopodimisdì, invezit, si varà une marcje pe pâs che si sierarà sul splaç dal cjistiel dulà che e je in program une assemblee plenarie. Sabide ai 18 di Avrîl i students a laran invezit intai lûcs là che si à combatût il prin conflit mondiâl. L’assessorât pe culture dal Comun di Udin al à ancje metût adun par vinars une schirie di apontaments laterâi al event centrâl che a previodin concierts, mostris, percors artistics e altri ancjemò.