A tornin i “Biomovies” dal Museu furlan di storie naturâl

Il Museu furlan di storie naturâl al torne a proponi “Biomovies”, il cicli di films dedicât ae nature. Ta cheste edizion la rassegne, metude adun cun Centro Espressioni Cinematografiche, Sondrio Festival, ARPA e LaRea, e frontarà i problemis leâts ae alimentazion, la fam e lis straçariis, la sostenibilitât dai stîi di vite. Il prin apontament, cu la proiezion dal film documentari “Food inc.” di Robert Kenner, al è in program martars ai 14 di Avrîl a vot e mieze di sere (20.30) alì dal Visionario. Stes orari e stes lûc, ma martars ai 21 di Avrîl, pal secont cine in program, ven a dî “Fresh”. Lis seradis a saran introdusudis di Massimo Buccheri, Luca Dorigo e Paolo Glerean dal Museu e di Daniela Peresson de AIAB. La jentrade e je libare.