Consegnâts vuê i lavôrs de ciclabile par Mulin Gnûf

Si sbloche un altri dai cantîrs fers par vie dal pat di stabilitât. Vuê di matine di fat, denant de scuelute di vie Alba, si à vude la consegne dai lavôrs de gnove trate de ciclabile che di plaçâl Osoppo e menarà a Mulin Gnûf. Si fevele di 1,9 chilometris di piste che a laran a leâsi cul percors intercomunâl des roiis che si svilupe par plui di 10 chilometris e che al mene fintremai Çumpite, in comun di Reane. Ae consegne dai lavôrs a jerin il sindic Furio Honsell, l’assessôr pe mobilitât Enrico Pizza, e il conseîr comunâl delegât di cuartîr Michele Vicario. La opare, che e costarà in dut 740 mil euros (che par un tierç a divegnin des jentradis de lotizazion de aree Terminal Nord), e permetarà ancje di intervignî su cualchi pont critic. Al è il câs di vie Biella, là che si fasarà sù il marcjapît, ma ancje des viis Alba e Rizzolo.