Poie convinte dal Comun al FEFF

A son passe cent i events leâts ae edizion 17 dal Far East Film Festival, la rassegne dedicade al cine popolâr de Asie orientâl, in program a Udin dai 23 di Avrîl ai 2 di Mai. Si va dai laboratoris ai marcjâts, dai spetacui di cusine aes esibizions di arts marziâls, e v.i. Cun di plui, ai 30 di Avrîl, e torne ancje la Gnot Zale. Par tancj di chescj apontaments si à la colaborazion direte dal Comun: si va dal tai dal 90% su la tasse di ocupazion di teren public ae disponibilitât sore nuie di 18 cjasutis espostivis, par rivâ al slungjament dai oraris pai parcs machinis in struture inte gnot dai 30 di Avrîl (di nûf di sere a une di gnot). Pal program in detai dai events dal FEFF si pues lâ sul sît internet events.farestfilm.com .