Trê mil zovins in citât pe Marcje de Pâs

A son cirche 3 mil i zovins che îr a son stâts presints ae Marcje pe Pâs ator pes viis de citât. I protagoniscj dal event a son stâts duncje fantats e fantatis che a àn prime partecipât a 10 laboratoris sparniçâts in diviers lûcs de citât e po dopo a àn dât vite a un corteu pacific e colorât che ju à puartâts ae assemblee plenarie in cjistiel. La Marcje pe Pâs e à viodût la presince di diviers aministradôrs publics, cul sindic Furio Honsell e la assessore regjonâl Loredana Panariti, ma ancje di citadins che a son lâts daûr al corteu tacât di plaçâl XXVI Luglio, lûc simbul pe Resistence, par rivâ fin al cjistiel.