Dispatriâts, incuintri in Comun cul viceministri Bubbico

“Il probleme dal acet dai dispatriâts che a domandin asîl e che a rivin inte nestre regjon vie tiere al à di jessi frontât a nivel statâl. Lu vevi za segnalât in audizion denant de Comission Schengen e lu ai tornât a dî al viceministri Bubbico, che i ai agrât pal so interessament. Intai ultins 18 mês, Udin al è stât obleât a gjestî ogni mês une emergjence par podêi dâ acet al flus continuât di dispatriâts rivâts in citât che a domandin asîl. Se bandonadis, chestis personis a riscjin di rapresentâ simpri di plui un probleme di ordin public. O domandìn duncje che si ciri di slizerî la pression che Udin al patìs zaromai di timp”. Chestis lis peraulis dal sindic di Udin, Furio Honsell, ae fin dal incuintri vût a palaç D’Aronco cul viceministri dal Interni Filippo Bubbico. Un incuintri promovût dal senatôr Carlo Pegorer là che a àn partecipât ancje il prefet di Udin Provvidenza Delfina Raimondo, l’assessôr regjonâl Gianni Torrenti, la assessore comunâl Antonella Nonino e diviers parlamentârs dal Friûl – Vignesie Julie. “Vuê o soi chi ancje par manifestâ la volontât dal guvier talian a vierzi une fase gnove di acet in dute la Europe e no dome a nivel statâl e i fats tragjics di chescj dîs a àn sburtât lis decisions su scjale europeane – al à dite il viceministri Bubbico – dut câs no si à di cjapâ sot gjambe il fenomen dai dispatriâts che a rivin vie tiere dispès propit par vie che altris paîs europeans no metin in vore in maniere juste lis normativis”.