Program de manifestazion pai 25 di Avrîl

Come ogni an, inte zornade dai 25 di Avrîl, si davuelzarà a Udin la manifestazion par celebrâ la fieste de Liberazion dal nazifassisim. La iniziative, inmaneade dal Comitât pe difese dal ordin democratic e des istituzions republicanis, e tacarà a dîs mancul un cuart di matine (9.45) cu la adunance in Zardin Grant. Di li la manifestazion si movarà dilunc des viis della Vittoria e Giovanni da Udine, par rive Bartolini, plaçute Marconi, Marcjât Vieri par rivâ in place Libertà. Chi, a tacâ di dîs e mieze di matine (10.30) si varan i intervents uficiâi. Tor undis e mieze (11.30) la manifestazion si spostarà in plaçâl XXVI Luglio là che al è il Monument de Resistence che chest an si mostre te sô forme origjinarie in gracie di un intervent di restaur. Te stesse zornade une delegazion e puartarà une corone ancje alì dai cimitieri britanic di Tavagnà. La vilie dai 25 di Avrîl, invezit, a nûf di sere (21.00) une cerimonie di fûcs in cjistiel e ricuardarà i partigjans fusilâts e l’agjent picjât intes presons di Udin ai 9 di Avrîl dal 1945. Dongje de cerimonie uficiâl, ancje pal setantesim inovâl de Libarazion, si varan diviersis iniziativis in program za a partî dai 23 di Avrîl intai lûcs simbul de memorie citadine. Ancje chest an i manifescj cul salût dal sindic pe fieste de Liberazion a son fûr par talian e par furlan. Si ricuarde che ai 25 di Avrîl i autoparcs in struture a restaran vierts a paiament intant che chei altris puescj machine a saran sore nuie.