Un milion par gnovis oparis dal cont consuntîf 2014

La Zonte udinese e à fat bon il cont consuntîf dal 2014, che cumò al varà di passâ pal esam dal Consei comunâl. Si trate dal ultin rindicont di meti jù daûr dai principis contabii vieris, dal moment che cul 2015 e jentre in vore la gnove contabilitât armonizade. Di un pont di viste tecnic il document si siere cuntun civanç tor dai 20 milions di euros, pe plui part vincolâts o metûts par cuvierzi credits dificii di scuedi o par altris situazions di risi. Chel istès, la Aministrazion comunâl si cjate a vê a disposizion cuasi 1 milion di euros par meti in cantîr gnovis oparis. Il consuntîf al mostre jentradis par 150 milions di euros dividudis tra contribûts par 68 milions, jentradis tributariis par 52 milions (plui de metât di Imu) e extratributariis par 29,5 milions di euros (tra chescj 13,7 milions a rivin di servizis e 5,1 milions dai utii des partecipadis). Sul front des spesis, invezit, chês ordenariis a son di 133,6 milions di euros, i rimbors di prestits 13,7 milions e lis spesis in cont capitâl 8,1 milions. Tra lis spesis ordenariis plui gruessis o cjatìn chês par prestazions di servizis (55 milions) e chês pai 899 dipendents (34,3 milions).