Presentade “Udine Rainbow” cuintri de omofobie

Promovude de Union Europeane za dal 2007, ogni 17 di Mai e cole la Zornade internazionâl cuintri de omofobie e de transfobie. Un inovâl che chest an, pe prime volte, ancje il Comun di Udin al ricuarde cu la manifestazion “Udine Rainbow” che e propon diviersis iniziativis metudis adun cu la Comission pe paritât e cu lis associazions impegnadis su chestis tematichis. “Manifestazions come cheste – al à comentât vuê il sindic Furio Honsell intal presentâ il program dai apontaments adun cu la assessore Cinzia Del Torre, cu la presidente de Comission comunâl pe paritât Sara Rosso e cul president di Arcigay Friûl Giacomo Deperu – a son impuartantis par vie che, pal bon stâ di ducj, al è sante scugne garantî paritât di oportunitâts e di dirits a ducj i citadina, di là dai lôr orientaments sessuâi”. Il program si invie sabide ai 16 di Mai a cuatri e mieze dopodimisdì (16.30) in vie Lionello cuant che il sindic al disvuluçarà dal barcon di palaç D’Aronco la grande bandiere cui colôrs dal arc di S. Marc che e je stade regalade al Comun des associazions lgbt. In chel, in plaçute Lionello, si varà une Flash Mob par sensibilizâ la opinion publiche su la lote cuintri de omofobie. La dì dopo di dîs di matine a vot di sere (10.00 – 20.00) in vie Lionello la associazion universitarie Iris e la sede udinese di Erasmus Student Network Italia a tignaran un bancut informatîf. Lunis ai 18 di Mai, a sîs e mieze sot sere (18.30) la Cjase des Feminis i darà acet al incuintri “Madre per sempre” cun Christian Grimaldi. Joibe ai 28 di Mai, a sîs sot sere (18.00), alì de librarie Friuli si varà la anteprime taliane dal libri di Giovanni Dall’Orto “Tutta un’altra storia. L’omosessualità dalla Bibbia al secondo dopoguerra”. Sabide ai 30 di Mai, a cinc dopodimisdì (17.00), il program de manifestazion si sierarà cul incuintri “Essere genitori e scoprirsi lgbt… si rimane sempre genitori” alì dal circul Arci “Mis(s)kappa. “Udine Rainbow” e je stade inmaneade, in plui che dal Comun e de Comission comunâl pe paritât, ancje de Arci Comitât Teritoriâl dal Friûl – VJ, Arcigay Arcobaleno di Triest, Arcigay Friûl Nuovi Passi, Arcilesbica di Udin, AGEDO, Cjase des Feminis, CSS, ESN NASE di Udin, Associazion Universitarie Iris, PazzaIdea, SeNonOraQuando, e TransGender dal Friûl – VJ.