Dai 15 ai 17 di Mai la mont furlane e rive in citât

La mont furlane e ven jù in citât par presentâ i siei paisaçs, i siei percors, lis sôs tradizions, la sô storie e la sô gastronomie. Lu fâs cu la prime edizion di “Montagna in città”, event che dai 15 ai 17 di Mai al mudarà il splaç dal cjistiel di Udin intune grande vitrine di dut ce che lis monts dal Friûl a ufrissin a cui che al à gust di cognossilis e di visitâlis. A saran uns trente lis postazions a disposizion dai visitadôrs che a van des ufiertis enogatronomichis a chês di promozion istituzionâl. Il program però al previôt ancje une vincjine di apontaments che a van dai incuintris cui autôrs ae musiche, des testemoneancis di personaçs di prin plan de mont furlane aes conferencis sui diviers aspiets de culture alpine. L’event al è metût adun dal Comun e de associazion Friûl 2.0 in colaborazion cun Turismo FVG, Assorifugi, CAI, ERSA e altris realtâts dal teritori. La manifestazion si invie vinars ai 15 di Mai a cinc dopodimisdì (17.00) par sierâsi po domenie ai 17 di Mai tor sîs e mieze sot sere (18.30).