Ai 30 di Mai e torne la Gnot dai letôrs

Dopo dal grant sucès de prime edizion e torne ancje chest an la “Gnot dai letôrs. Di lei e di contâ”, event dedicât ae leture, aes librariis e ai libris. Cussì, sabide ai 30 di Mai di trê e mieze dopodimisdì a undis di sere (15.30 – 23.00), il centri di Udin i darà acet a 34 apontaments tra leturis par fruts, cercis, laboratoris di scriture creative, spetacui teatrâi, musiche, pedaladis di grup e tant altri ancjemò. La grande novitât di chest an e je la sielte di cjapâ dentri intal program ancje “Il Giro d’Italia delle 80 librerie” che al pee tra di lôr libris e biciclete. La Gnot dai letôrs e je coordenade dal Ufici Culture dal Comun di Udin e de associazion culturâl Bottega Errante. Chest viaç intal mont dai libris al previôt undis stazions ator pe citât, ven a dî: vie Gemona, plaçute Antonini, slarc del Pecile, place Marconi, la Loze dal Lionel, Cjase Cavazzini, vie Cavour, la biblioteche Joppi, la Galarie Bardelli, cort Morpurgo e vie Vittorio Veneto.