Disponibile la gnove App “Udine Vicina”

E je stade lançade vuê di buinore in maniere uficiâl di “Udine Vicina”, la aplicazion par smartphone e tablet metude adun di InfoFactory cul contribût dal Servizi sistemis informatîfs e telematics dal Comun di Udin. In plui de mape gjenerâl di Udin, la App e ufrìs schedis e percors par scuvierzi i tesaurs de citât. Une sezion e je dedicade dute ae culture cun gnovis simpri inzornadis su mostris e events, in plui des schedis sui undis museus citadins. Une altre sezion e je dedicade aes gnovis e ai events, cuntun calendari complet dai apontaments. A son po sezions dedicadis a ospitalitât e ristorazion, e ai fruts fin ai 14 agns. Une altre sezion e je chê “Smart City” che e permetarà di cognossi oraris e percors dai mieçs publics gjestîts de Saf, i autoparcs in struture che a son disponibii, tropis bicicletis che a son tes diviersis stazions di nauli, lis informazions su la racuelte diferenziade e sui splaçs ecologjics i Open Data dal Comun e altri ancjemò. E je po la sezion cu lis informazions sul trafic dadis dal comant de polizie locâl. La gnove aplicazion e je stade svilupade ancje in gracie de colaborazion cun Turismo FVG, NET, SSM, SAF, Confcumierç, Polizie Locâl, centrâl operative dal bike sharing, e-magazine e sît udinecultura dal Comun.