In mostre l’unic repert epigrafic dal antîc simitieri ebraic

E je une testemoneance di storie furlane piçule, ma impuartante chê che e je stade presentade vuê a palaç Morpurgo dal assessôr pe culture, Federico Pirone, dal assessôr provinciâl Carlo Teghil e di diviers rapresentants de comunitât ebraiche. Si fevele di un slambri di piere di 34 centimetris par 22 cuntun test parziâl su sîs riis dedicât a di une femine muarte te seconde metât dal 1.400. Par ce che si sa, al è l’unic element epigrafic sorevivût dal antîc simitieri ebraic di Udin. La scuvierte di chest toc di lapide e rimonte al 2010, ma dome di cualchi mês si à rivât a recuperâlu dal lûc là che si cjatave inmurât, o sei il mûr di cente dal educandât Uccellis. Il repert si podarà viodilu in palaç Morpurgo, altri lûc simbul de presince ebraiche in citât, a testemoneance de storie e de identitât plurâl di Udin.