11 puescj a disposizion in Comun pal Servizi Civîl

Il Comun di Udin al aderìs al bant regjonâl pal Servizi Civîl Solidari cun cinc progjets indreçâts a fantatis e fantats di 16 e 17 agns residents in Friûl – Vignesie Julie. A partî dal mês di Lui la Aministrazion comunâl i darà acet a 11 volontaris che a àn timp fin ai 19 di Jugn par presentâ la domande. Il servizi al podarà davuelzisi dilunc vie dal an scolastic par un totâl di 360 oris o dome vie pal Astât cuntun impegn complessîf di 240 oris. Doi puescj a son a disposizion alì dal “Punto Incontro Giovani”, doi alì des “Officine Giovani” e altris doi intal ufici dal progjet O.M.S. “Città Sane”. Simpri doi i puescj a disposizion ancje intal progjet “Ambito a colori” dal Ambit distretuâl udinês. Trê invezit i volontaris che a saran impleâts tra Ludoteche comunâl e Ludobus. La Regjon e cuvierzarà lis spesis sigurativis e la paie finâl. Il servizi al previôt che la esperience lavorative e sedi anticipade di un moment di formazion. Lis domandis a àn di jessi presentadis in cjarte semplice, daûr dai modei che si cjatin alì dal ufici protocol dal Comun in vie Lionello 1.