Program des iniziativis pe Fieste de Republiche

Diviersis iniziativis a son in program doman, martars ai 2 di Jugn, par celebrâ la Fieste de Republiche. Par dute la zornade a saran vierts i museus storics militârs de citât. A saran vierts il museu de Brigata Julia, in vie S. Agostino 8 e chel dal tierç reziment Genio Guastatori, in vie San Rocco 180, di 9 a 12.30 e di 14 a 16.30. Jentrade sore nuie ancje ai Museus Civics. I museus a saran vierts di 10.30 a 19. Cun di plui inte glesie di Sant Antoni si podarà viodi, sore nuie, la mostre dal pitôr Mario Micossi, che e sarà vierte di 10 a 12.30 e di 16.30 a 19. La manifestazion pe fieste de Republiche e tache a 11 cu la esibizion de Fanfare de Brigata Alpina Julia, in place XX Settembre, in place Matteotti e che e rivarà in place Libertà a 12 pe cerimonie uficiâl. Conciert sot de Loze dal Lionello de corâl dai Alpins di Passons e cerimonie a 18 in place Libertà cu lis autoritâts citadinis. La fiste si sierarà cul conciert a 19 al Teatri gnûf Zuan di Udin, sore nuie, de Orchestre dal Conservatori statâl “Jacopo Tomadini” di Udin.