Si invie vinars la iniziative “Par furlan ator par Udin”

Cul prin apontament in program vinars ai 5 di Jugn a sîs sot sere (18.00) te sale Corgnali de biblioteche civiche “Joppi”, la Aministrazion comunâl e scree “Par furlan ator par Udin”, un gnûf cicli di iniziativis inmaneât dal Sportel pe lenghe furlane dal Comun di Udin dedicât ae promozion dal furlan cu la presentazion di libris, audiovisîfs, materiâi multimediâi e incuintris a teme. Il calendari de manifestazion si vierç cu la presentazion de riviste leterarie “La Comugne” editade de KappaVu. A presentâ la publicazion il so coordenadôr editoriâl Paolo Cantarutti, i autôrs Raffaele Serafini e Giacomo Trevisan, il fotograf Marco Cuoco, il gjornalist Walter Tomada, e Giuliano Velliscig de KappaVu. L’incuintri al è moderât di Marco Stolfo dal Sportel pe lenghe furlane. Altris informazions si pues cjatâlis ae direzion www.comune.udine.it/Furlan_in_Comun. La jentrade e je libare.