Dôs visitis vuidadis inte suaze des Zornadis dal Tiepolo

In ocasion des Zornadis dal Tiepolo il servizi didatic dai Museus Civics dal Comun di Udin, in colaborazion cul Museu Diocesan e cu lis Galariis dal Tiepolo, al à inmaneât doi percors vuidâts par scuvierzi lis oparis di chest artist. Sabide ai 6 di Jugn, a 11 di matine, si varà “L’arte del Tiepolo tra architettura e scultura in città” cul architet Andrea Trincardi che al compagnarà il public intune cjaminade ator pe citât par scuvierzi la architeture e la sculture dai timps dal Tiepolo. Si partìs di Cjase Cavazzini. Il cost dal biliet al è di 8 euros. Sabide ai 13 di Jugn, simpri a 11 di matine, si varà invezit la visite vuidade “L’arte del Tiepolo nel Castello di Udine e in Palazzo patriarcale”. Si partìs dal cjistiel, cun Martina Lorenzoni che e fevelarà dai frescs dal salon dal Parlament e des oparis dal artist venezian che si cjatin inte Galarie di art antighe dai Museus Civics, par rivâ po al Palaç patriarcjâl là che Mariarita Ricchizzi e presentarà i lavôrs dal Tiepolo che si cjatin intal Museu Diocesan. Ancje ta chest câs il cost dal biliet al è di 8 euros.