Dut pront pe XII edizion de Zornade Mondiâl dal Zûc

Il centri storic di Udin si prepare a deventâ ancjemò une volte il teatri di cetantis ativitâts ludichis, sabide ai 6 di Jugn, pe Zornade mondiâl dal zûc. Cun di fat, ancje chest an, di cuatri dopodimisdì (16.00) indenant la capitâl furlane e proponarà passe 70 ativitâts che si davuelzaran in vincj lûcs dal centri cu la colaborazion di passe 50 tra ents e associazions che a àn aderît ae iniziative. A ‘nt sarà par ducj i guscj: dai zûcs antîcs aes bocis, dai laboratoris creatîfs a diviersis ativitâts sportivis, dai zûcs di rûl a chei di societât.