Si slargje la rêt dal teleriscjaldament

Si slargje in citât la rêt dal teleriscjaldament. L’assessôr comunâl pal ambient e pe mobilitât, Enrico Pizza, al à visât che in curt si inviaran i lavôrs par meti jù la rêt ancje in vie Cicogna. Dopo vê finît l’intervent e vê ativât il servizi in vie Tiberio Deciani fin li de scuele Ellero, i residents de laterâl a àn domandât di podê leâ al servizi di teleriscjaldament ancje lis lôr cjasis. I lavôrs su vie Cicogna a tacaran cui 15 di Jugn, ma za martars ai 9 di Jugn – a sîs e mieze sot sere (18.30) alì de parochie di S. Quarin – al è in program un incuintri cui citadins par informâju sul program dai lavôrs e sui efiets dal cantîr su la viabilitât. Che si trati di un bon progjet – al zonte l’assessôr Pizza – si lu capìs ancje dal fat che dopo di chê dai residents di vie Cicogna a son rivadis ancje altris domandis di privâts che a vuelin peâsi ae rêt. Il progjet al jere nassût di une acuardi tra la Aziende ospedaliere-universitarie Sante Marie de Misericordie, la Universitât e il Comun di Udin e al à un cost complessîf di 113 milions di euros, cuviert par plui di un tierç di fonts publics.