Materiâi sportîfs regalâts aes scuelis

Ta chestis zornadis il sindic Furio Honsell e l’assessôr comunâl pal sport, Kristian Franzil, a àn zirât dutis lis scuelis primariis e secondariis di prin grât de citât par consegnâ a fruts e insegnants dai “pacuts sportîfs” che si insuazin intal progjet “Moviti”. Il progjet, imbastît dal Comun di Udin e svilupât de associazion sportive “Prima Scuola Pallavolo” in colaborazion cu lis scuelis de citât, cun associazions e federazions sportivis, al à promovût cuntune schirie di intervents la difusion de pratiche sportive, massime intai siei aspiets educatîfs e partecipatîfs. Il regâl consegnât dal sindic e dal assessôr al segne la sierade de seconde edizion dal progjet dulà che a àn partecipât 23 scuelis primariis e 9 scuelis secondariis di prin grât. “O vin volût regalâ ai fruts – al à spiegât l’assessôr comunâl pal sport e pe istruzion, Kristian Franzil – dai articui sportîfs par stiçâ e par promovi la pratiche di dutis lis dissiplinis, in maniere di evitâ une specializazion masse adore intun unic sport”. Il progjet cumò al è rivât insom, al à zontât l’assessôr, ma in curt si fasarà un incuintri cun dutis lis societâts sportivis e i rapresentants des scuelis de citât par viodi se e je la pussibilitât di lâ indenant cu la iniziative in gracie dal impegn volontari des societâts e des federazions sportivis.