Joibe secont apontament di “Par furlan ator par Udin”

“Par furlan ator par Udin” al va indenant cuntun altri incuintri dedicât ae leterature furlane contemporanie. Dopo de scree dai 5 di Jugn cu la presentazion dal numar 25 de riviste leterarie “La Comugne”, la manifestazion inmaneade dal Sportel pe lenghe furlane dal Comun di Udin e propon, joibe ai 18 di Jugn a sîs sot sere (18.00) inte sale Corgnali de “Joppi”, une sorte di zimulament cul plui impuartant concors leterari par furlan, o sei il Premi S. Simon. Si trate di “Mi ven di reading”, apontament che al à chê di promovi la edizion 2015 dal premi e che al à za tocjât Spilimberc, Tumieç, Codroip, Cjarlins e Cividât. Ospit de iniziative al sarà Tarcisio Mizzau, autôr di “Speriments di perfezion”, il romanç che al à vinçût la edizion stade dal S. Simon, intervistât dal gjornalist Walter Tomada e compagnât di Carlo Tolazzi che al leiarà cualchi toc de opare premiade. A coordenâ l’incuintri al sarà Marco Stolfo dal Sportel “Furlan in Comun”. La jentrade e je sore nuie.