Presentade la manifestazion “Le stagioni della memoria”

Al è pront par partî “Le stagioni della memoria”, il program di apontaments che il Comun di Udin al à inmaneât inte suaze de manifestazion “Udine storie in corso 1914-2018” che e ricuarde i cent agns de prime vuere mondiâl. La iniziative, che e gjolt de colaborazion e dal contribût di cetancj sogjets ancje di nivel internazionâl, no à chê di memoreâ chel conflit – al spieghe l’assessôr comunâl pe culture, Federico Pirone – ma di svilupâ un dibatit su la vuere. La manifestazion e je svilupade su sîs moments. Il prin si invie cui 24 di Jugn e al va indenant fintremai i 28 dal mês cun spazis musicâi, leteraris e materiâi cinematografics mai viodûts prime. Il secont moment si davuelzarà jenfri Lui e Avost. Il tierç al è in program tra i 29 e i 31 di Otubar e al proponarà la cunvigne internazionâl “Le stagioni della memoria” e la scree de mostre fotografiche “Con gli occhi della storia”. La cuarte tape si tignarà dai 16 ai 18 di Dicembar, la cuinte dai 12 ai 14 di Fevrâr dal 2016 e la ultime dai 20 ai 22 di Mai. Par vê plui informazions su la manifestazion si pues contatâ l’ufici culture dal Comun (0432 414713 e 414739 – infocultura@comune.udine.it) o lâ sul sît www.udinestorieincorso.it .