Ai 20 di Jugn si invie “Campo allargato”

Dialic tra nature e artifici, conservazion e mudament. Al è su la tension tra chescj elements che si fonde la edizion 2015 di “Campo allargato”, il percors artistic di Ovunqu(è)Estate, calendari estîf di iniziativis ator pai cuartîrs promovût dal assessorât pal decentrament dal Comun di Udin. La rassegne, rivade aromai ae cuinte edizion, e propon sedis apontaments che a varan tant che suaze il parc Giorgini di vie Colugna. Si tache sabide ai 20 di Jugn a sîs sot sere (18.00) cu la scree dal percors artistic di Land Art “Mutamenti” là che Corrado Della Libera e Aldo Nodari a presentaran lis oparis prontadis di tredis artiscj de nestre regjon cul compagnament musicâl di Antonella Macchion e Davide Sciacchitano. Il secont apontament – titulât “Botanica per tutti: il giardino commestibile” e curât di Giusi Foschia e Valentino Verona – si tignarà martars ai 23 di Jugn, simpri a sîs sot sere (18.00). Miercus ai 24 di Jugn, di sîs e mieze a siet e mieze sot sere (18.30 – 19.30), si tignarà la prime lezion di “Movimento espressivo metodo Rio Abierto” par cure di Cristina De Nipoti. La dì dopo, di dîs a misdì e di cinc fin siet sot sere (10.00 – 12.00 e 17.00 – 19.00), si varà il laboratori artistic “Trasformazioni Tonali” curât de associazion “Il segno Zero” di Martignà. La rassegne larà po indenant fintremai i 16 di Lui. Se al ves di plovi, i events a saran rimandâts al dì dopo.