1 milion 400 mil euros pes impresis dal centri

Il Comun al met a disposizion un finanziament di 1 milion 400 mil euros par favorî la ativitât des impresis piçulis e mezanis dal centri. Si trate di fonts cjapâts dentri dal Pisu, il Plan integratîf di svilup urban sostignibil pe ricualificazion dal centri storic. 1 milion e 200 mil euros di chescj a rivin de Regjon e 200 mil euros de aministrazion comunâl. In curt al sarà publicât il bant dai finanziaments, lis impresis a varan timp fin ae fin dal mês di Setembar par presentâ la domande. Intant la zonte comunâl e à fat bogns i criteris di amissibilitât e di valutazion dai progjets. A son passâts di 3 a 5 i membris de comission. Si trate di rapresentants dal Comun, de Regjon e de Cjamare di Cumierç. A podaran gjoldi dai contribûts i progjet che a previodin une spese che e va di un minim di 25 mil euros a massime 125 mil euros. Il finanziament al podarà cuvierzi fin al 80% des spesis sostignudis par invistiments fats dal Prin di Zenâr 2016 ai 31 di Dicembar 2017.