Vinars scree par “Altri sguardi” a palaç Giacomelli

Vinars ai 26 di Jugn a cinc e mieze dopodimisdì (17.30) a palaç Giacomelli, sede dal Museu Etnografic dal Friûl, si scree “Altri sguardi”, la mostre fotografiche imbastide de associazion “Nuovi Cittadini Onlus” adun cul Comun e cui Museus Civics di Udin. Par metile adun i ents che in Friûl a svilupin i progjets di acet pai sfolâts che a domandin asîl a àn inmaneât a Udin, a Pordenon e a Gurize dai laboratoris didatics educatîfs su lis tecnichis di fotografie pai dispatriâts che, cul lôr smartphone, a àn dât une vision personâl dal lûc che ur da acet. La mostre, formade di 25 panei, si podarà viodile fin ai 26 di Lui tai oraris di viertidure dal Museu Etnografic, dal martars ae domenie, di dîs e mieze di matine a siet sot sere (10.30 – 19.00).