Presentât il program de Gnot Blancje

La edizion 2015 de Gnot Blancje udinese, in program sabide ai 4 di Lui, i ufrirà a ducj i visitadôr un program siôr di apontaments che a van de musiche – cuntune anteprime straordenarie di Remo Anzovino, a siet e mieze di buinore (7.30), in place S. Jacum – ae culture e ae animazion par fruts. Il program des iniziativis al è stât presentât vuê, joibe ai 25 di Jugn, a palaç D’Aronco cu la partecipazion dal assessôr pes ativitâts produtivis e turistichis Alessandro Venanzi, de presidente de associazion UdineIdea Arianna Calcaterra, del president di Confcumierç Giuseppe Pavan, e de rapresentante di Confartesanât Eva Seminara. “I vin domandât a dutis lis ativitâts comerciâls di lâ fûr ancje su lis stradis e di deventâ protagonistis dal event cu lis lôr ativitâts e cun iniziativis di animazion – al à ricuardât Venanzi – intant che la aministrazion comunâl e à contribuît a insiorâ il palinsest cun ufiertis culturâls, cu la gratuitât dai spazis pes ativitâts promozionâls e di animazion, e cu la deroghe orarie pal rumôr slungjade fin dôs di gnot”. La serade e sarà compagnade di cetantis esibizions musicâls imbastidis ancje in colaborazion cul cartelon di Udine Jazz e di Homepage Festival Road Show. Tra i events al risalte l’apontament in cjistiel, di nûf e mieze di sere indenant (21.30), là che al è dentri ancje il conciert dai Carnicats e là che la ARLeF e sarà presinte cul progjet Fûrxfur (fûr par furlan). Il tango argjentin al sarà invezit protagonist in place XX Settembre di siet sot sere a dôs di gnot (19.00 – 2.00), intant che i amants des bicicletis a varan la ocasion di scuvierzi Udin cuntun zîr in bici in program di sîs e mieze a vot di sere (18.30 – 20.00). La animazion par fruts e sarà disponibile in Marcjât Vieri cul “Villaggio dei Puffi”, in vore di cuatri dopodimisdì a undis di sere (16.00 – 23.00), e cu la viertidure straordenarie di vot e mieze a undis e mieze di sere (20.30 – 23.30) de Ludotache. Cjase Cavazzini e il Museu Etnografic a saran vierts cun jentrade libare di nûf a undis di sere (21.00 – 23.00). A palaç Giacomelli si podarà visitâ la esposizion “Il grano. Storia di una pianta rivoluzionaria” e alì dal Museu di Art Moderne e Contemporanie la mostre “Neorealismo, astrazione e oltre”. La ufierte museâl e previôt po, simpri a jentrade libare, la Galarie “Tina Modotti” (16.00 – 21.00), lis Galariis dal Progjet di palaç Morpurgo (16.00 – 18.00) e la Cjase de Fradaie (16.00 – 19.00). Cun di plui, in gracie de colaborazion cun Ssm, di nûf di sere a une di gnot (21.00 – 1.00) al sarà garantît l’acès gratuit ai autoparcs in struture.