Belanç cence aument des tarifis e cun fonts pai cantîrs

Nissun aument des tassis, confermâts i servizis pai citadins, lavôrs publics che a tornin a partî. A son i principis di fonde dal belanç di prevision pal 2015 dal Comun di Udin, fat bon vinars ai 27 di Jugn de Zonte comunâl. Il document finanziari al va al pâr sui 169 milions. Par chel che al rivuarde lis jentradis, 67,6 milions a rivin di trasferiments (62 di chescj di divignince regjonâl), 52,7 si riferissin aes jentradis tributariis (Irpef, Imu, Tari, Tasi e v.i.) e 31,3 a jentradis extratributariis. Sul front des spesis ordenariis, la vôs principâl – o sei 52,8 milions di euros – e diven des prestazions di servizis. Par chel che al rivuarde lis jentradis a vegnin manitignudis lis stessis alicuotis dal an passât pe adizionâl Irpef, pe IMU, pe TASI e ancje pe TARI. Intal 2015 a son a disposizion sù par jù 7 milions e mieç di euros par gnovis oparis e intervents di manutenzion, che si à però di zontâi altris 14 milions liberâts dal pat di stabilitât par lâ indenant cui cantîrs za inviâts. Tra i ponts di fonde dal belanç o vin ancje la conferme dai servizis, massime par fruts, zovins, anzians e personis in situazions di disasi cun 4,2 milions di intervents pes personis plui indenant cui agns, 3,8 milions pai nîts, altris 3,8 milions pe assistence, 2,3 milions pe gjestion des disabilitâts e cuasi 1 milion par ativitâts pai zovins, pai fruts e pai centris estîfs.