Friuli Doc, a tornin lis colaborazions cu la Universitât

Dopo che a mancjavin di cualchi an, Friuli Doc al torne a dâi acet a iniziativis metudis adun in colaborazion cu la universitât di Udin. L’acuardi al è stât sotscrit vuê dal assessôr comunâl pes ativitâts produtivis e turistichis, Alessandro Venanzi, e il retôr de universitât furlane, Alberto Felice De Toni. Doi i apontaments in program inte edizion di chest an. Vinars ai 11 di Setembar, in place S. Jacum a sîs e mieze sot sere (18.30), si fevelarà di “Enogastronomie di cualitât e marketing teritoriâl” intun incuintri là che, tra i altris, a parteciparan ancje il vicepresident de Regjon Sergio Bolzonello e il stes assessôr Venanzi. Ai 12 di Setembar, stes lûc e stesse ore, si resonarà, ancje cu la partecipazion dal assessôr regjonâl Cristiano Shaurli, sul teme “La agriculture 3.0 – Ricercje e gnovis tradizions”. La liste in detai dai ospits e dutis chês altris informazions su la manifestazion a saran dadis intant de conference stampe di presentazion di Friuli Doc che e je in program joibe ai 3 di Setembar a undis e mieze di matine (11.30) a palaç Giacomelli (vie Grazzano, 1).