Presentade vuê la XXI edizion di Friuli Doc

E je stade presentade vuê sot misdì la vincjeunesime edizion di Friuli Doc che e varà tant che “testimonial” il gjornalist sportîf, Bruno Pizzul, e che chest an e je dedicade al Expo. A screâ la manifestazion, joibe ai 10 di Setembar a cinc e mieze dopodimisdì (17.30) in place Libertà, in plui di Pizzul a saran ancje aministradôrs e diviers dai protagoniscj de manifestazion. Dai 10 ai 13 di Setembar a saran plui di cent lis postazions logadis ator pes placis e pes stradis dal centri di Udin. Par cheste edizion di Friuli Doc la “mape dai savôrs” e conferme la presince dal ERSA in Marcjât Vieri, intant che Confartesanât e cjatarà puest in vie Vittorio Veneto e TurismoFVG in place S. Jacum. Ta cheste place si varan ancje i apontaments cu la scuele di cusine curâts dai fantats dal istitût Stringher e di cogos tra i plui innomenâts. Confermâts, dome cun cualchi justament, i sîts di chei altris esposidôrs. Nol è però dome mangjâ e bevi, cun di fat la Loze dal Lionel e je dute dedicade al furlan e a chês altris lenghis dal Friûl in gracie de colaborazion tra ARLeF, sportel comunâl par furlan e Radio Onde Furlane. Cun di plui la vitrine dai savôrs furlans e cres inmò di plui la sô vocazion culturâl ancje in gracie de colaborazion cun CSS, CEC e Vicino/Lontano che a proponaran spetacui e iniziativis di no pierdi. In dut però il program al previôt un centenâr di apontaments cun cinccent artiscj e siet palcs a disposizion. Il spetacul finâl, pe prime volte, nol sarà un conciert ma un event di teatri figuratîf acrobatic cu la “La Notte degli elementi” di “Circo e Dintorni”. Ancje chest an la manifestazion e varà a disposizion un sît internet (www.friuli-doc.it), un canâl Youtube, une pagjine Facebook e une aplicazion interative par smartphone e tablet. Par cui che al dopre lis rêts sociâls al è ancje disponibil l’hastag #ilmioFriuliDoc. In plui che sul sît, program e informazions su Friuli Doc si puedin cjatâ ancje sul sît dal Comun, www.comune.udine.it, o alì dal pont informatîf di vie Savorgnane 12. Tra i partners di Friuli Doc o cjatìn Regjon, Provincie, ERSA, TurismoFVG, Cjamare di Cumierç, Confartesanât e Universitât di Udin, CNA, SSM, SAF, NET, Feroviis Udin-Cividât, intant che a fâ di sponsors o vin Italpol, CrediFriuli, Fantoni, Goccia di Carnia, 2Pay e Portomotori.