Incuintri Comun-Regjon-Prefeture sul acet dai dispatriâts

A saran finîts dentri di dîs zornadis i lavôrs di ristruturazion di une part de palacine de ex caserme Cavarzerani, dulà che a cjataran acet un centenâr di dispatriâts e dulà che al sarà logât un presidi sanitari. Subite dopo si inviaran i intervents intune altre part de caserme che e sarà metude in sest dentri dal mês di Novembar dulà che a cjataran acet un altri grup di sfolâts e un presidi de cuesture pes pratichis des domandis di asîl. Po dopo a tacaran i lavôrs di ristruturazion di altris palacinis. Cun di plui une cincuantine di sfolâts che in di di vuê si cjatin atôr pe citât a cjataran acet daurman dentri de caserme. Al è chest il risultât dal incuintri di îr in Comun dulà che a partecipavin il sindic Furio Honsell, la assessore Antonella Nonino, il prefet Vittorio Zappalorto e l’assessôr regjonâl Gianni Torrenti. Inte riunion di îr al è ancje stât confermât che, dacuardi cu la Caritas, la Aministrazion comunâl e cirarà dai puescj di spiete in vie Ronchi là che lis personis a puedin stâ prime di jentrâ inte mense.